Gipuzkoak Itelazpiren esku utzi ditu bere DMR larrialdi-sarearen operazioa eta mantentzea

Gipuzkoako Foru Aldundiak Itelazpiri eskumen gehiago esleitu dizkio, segurtasunerako komunikazio-azpiegitura kritikoen arloan lankidetza publikoaren eredua indartuz.

Joan den abenduan, Gipuzkoako Foru Aldundiak —Gobernantza Departamentuari atxikitako Suteen Prebentzio eta Itzalketa eta Salbamendu Zerbitzuaren bitartez— eta Eusko Jaurlaritzaren telekomunikazio-sozietatea den Itelazpik lankidetza-hitzarmen bat sinatu zuten. Hitzarmen horren bidez, Itelazpik bere gain hartu ditu DMR (Digital Mobile Radio) teknologian oinarritutako Gipuzkoako larrialdi-sarearen operazioa eta mantentze integrala. Akordio hori Eusko Jaurlaritzaren, EUDELen eta hiru foru-aldundien artean telekomunikazio-azpiegiturak partekatzeko indarrean dagoen esparru-hitzarmenaren baitan kokatzen da. Hitzarmen horrek Itelazpi izendatzen du Euskal Autonomia Erkidegoko sektore publikoko edozein erakunderi zerbitzuak emateko gaitutako erakunde gisa.

Hitzarmena formalizatu ondoren, Itelazpiko talde teknikoek zerbitzuaren plangintza-fasea jarri zuten martxan. Fase horretan, eredu operatiboa definitu zen, beharrezko baliabide teknikoak identifikatu ziren eta landa-eremuko mantentze-lanetarako zerbitzu espezializatuak kontratatu ziren, Itelazpitik zentralizatutako koordinazio-, gainbegiratze- eta jarraipen-lanak osatzeko. Fase hori behar bezala amaitu ondoren, zerbitzua erabateko operazio-egoeran sartu da.

Gipuzkoako larrialdi-sarea

Gipuzkoako larrialdi-sarea misio kritikoko komunikazio profesionaletarako azpiegitura kritikoa da, DMR Tier III arkitekturaren gainean diseinatua, eta estaldura osoa eskaintzen du Gipuzkoako lurralde historiko osoan eta interes operatiboko inguruko eremuetan. Sareak etengabeko zerbitzua ematen die suhiltzaileei eta errepideen mantentze-lanetako langileei; izan ere, kolektibo horien jarduerak komunikazio fidagarriak, seguruak eta une oro erabilgarri egongo direnak eskatzen ditu.

Sarearen kommutazio- eta kontrol-nukleoa (Tier III kontrolagailua) Garberako Suhiltzaileen Parkean dago kokatuta. Bertatik kudeatzen eta koordinatzen dira lurralde osoan estrategikoki banatutako 21 oinarri-estazio erradiatzaileak, guztiak Itelazpik kudeatutako telekomunikazio-zentroetan kokatuak. Kontrolagailuaren eta oinarri-estazioen arteko interkonexioa Itelazpik berak operatzen duen irrati-komunikazio publikoko sare autonomikoaren bidez egiten da. Horrek sistemaren osotasun teknikoa bermatzen du, baita kudeaketa integratu batek eskaintzen dituen eskala-ekonomiak ere.

Lankidetza publikoaren eredua azpiegitura kritikoetarako

Hitzarmen honen bidez, Gipuzkoak sakondu egiten du Euskadiko telekomunikazio publikoen ekosisteman erakundeen arteko lankidetzaren bidean. Eusko Jaurlaritzako Gobernantza, Administrazio Digital eta Autogobernu Sailari atxikita dagoen Itelazpik zuzendaritza tekniko beraren pean biltzen du irrati-komunikazio kritikoen hainbat sareen operazioa —autonomia-erkidegokoak zein foru-erakundeetakoak—. Horrek eraginkortasun handiagoa, partekatutako baliabideen aprobetxamendu hobea eta gorabeheren aurrean erantzun tekniko arinagoa ekartzen ditu.

Gainera, Gipuzkoako DMR sarea Itelazpik kudeatutako zerbitzuen katalogoan sartzeak sinergiak indartzen ditu irrati-komunikazio publikoko TETRA sare autonomikoarekin. Horri esker, etorkizunean interoperabilitate- eta integrazio-eszenatoki berriak garatu ahal izango dira, lurraldeko larrialdi-zerbitzuen erantzuteko gaitasuna are gehiago handitzeko.

Sarearen datu nagusiak