Itelazpik Ganeta mendian kudeatzen duen instalazioa da, eta bertatik emititzen dira EiTBren irrati eta telebista seinaleak Bilbo inguruan.
Topaketak Itelazpiko zuzendari nagusi berriaren aurkezpen instituzionala egiteko eta EITBren irrati- eta telebista-seinaleen garraioaren eta hedapenaren modernizazioarekin lotutako proiektuak aztertzeko balio izan du. Itelazpik bi hamarkada baino gehiago daramatza seinale horiek operatzen eta kudeatzen.
Itelazpiko zuzendari nagusi Leire Aginakok eta EITBko zuzendari nagusi Andoni Aldekoak bilera egin dute aste honetan euskal irrati-telebista publikoak Bilbon duen egoitzan. Topaketak Aginakoren aurkezpen instituzionala egiteko aukera eman du; joan den irailaren 1ean sartu zen Itelazpiko Zuzendaritza Nagusian.
Bileran, bi erakundeetako zuzendaritzek lankidetza-esparru nagusiak eta elkarrekin garatzen dituzten proiektu estrategikoak aztertu zituzten. Harreman hori EITBk Itelazpiri bere irrati- eta telebista-seinaleak garraiatzeko eta hedatzeko egiten dion zerbitzu-enkarguaren bidez egituratzen da, Itelazpi Euskal Autonomia Erkidegoko sektore publikoaren bitarteko propioa den heinean.
Bi erakundeak urte anitzeko enkargu berri bat prestatzen ari dira gaur egun, lankidetza-esparru horri jarraipena emateko. Era berean, bileran EITBren irrati- eta telebista-emisioen garraio- eta hedapen-sistemak modernizatzeko eta ikus-entzunezko sektorearen bilakaera teknologikora egokitzeko abian diren ekimenak aztertu ziren.
Bi hamarkada baino gehiagoko lankidetza publikoa
EITBren eta Itelazpiren arteko lankidetzaren jatorria euskal irrati-telebista publikoa sortu zenetik, 1980ko hamarkadaren hasieran, hedatutako telekomunikazio-azpiegituretan dago. Dorreek, zentro igorleek, antenek eta garraio-sareek irrati- eta telebista-seinaleak herritarrengana eramatea ahalbidetu zuten, Euskal Herriko geografian zehar banatutako kokaleku estrategikoetatik.
2003an, Eusko Jaurlaritzak Itelazpi sortu zuen telekomunikazio-azpiegitura publiko horiek kudeatu, ezarri, mantendu eta ustiatzeko. Ikus-entzunezko seinaleen garraioaz eta hedapenaz gain, sektore publikoaren beharrei lotutako irrati-komunikazioko, transmisioko eta komunikazio elektronikoko zerbitzu berriak garatzeko erronka ere esleitu zion.
Harrezkero, Itelazpik EITBren bilakaera teknologikoa lagundu du, ikus-entzunezko zerbitzu publikoa eskaintzea ahalbidetzen duten azpiegiturak operatuz eta modernizatuz. Lankidetza hori erakunde publikoen arteko elkarlanaren adibide da, euskal gizartearentzat funtsezkoak diren zerbitzuen jarraitutasuna, fidagarritasuna eta egokitzapen teknologikoa bermatzeko.
Leire Aginakoren eta Andoni Aldekoaren arteko bilerak etapa berri bat ireki du harreman instituzional honetan, eta bi erakundeek Euskadiko irrati eta telebista publikoen eraldaketa teknologikoan elkarrekin aurrera egiten jarraitzeko duten borondatea berresten du.
Itelazpik Jaizkibel mendian kudeatzen duen instalazioa da, eta bertatik emititzen dira EiTBren irrati eta telebista seinaleak Donostia inguruan.
Itelazpik Zaldiaran mendian kudeatzen duen instalazioa da, eta bertatik emititzen dira EiTBren irrati eta telebista seinaleak Vitoria-Gasteiz inguruan.
