Murugaingo telekomunikazio-zentroa
Jarduketari esker, Murugaingo telekomunikazio-zentroko azpiegiturak indartuko dira, 51 metroko altuerako dorre berezi baten bidez. Dorrea prest egongo da eskakizun tekniko eta ingurumen-baldintza zorrotzei erantzuteko.
ITELAZPIk COX T&I SL enpresari (COX Taldea) esleitu dio Murugain mendiko gailurrean (776 m), Arrasate, Aretxabaleta eta Aramaioko udalerrien arteko mugan dagoen telekomunikazio-zentroan telekomunikazio-dorre berri bat hornitu eta instalatzeko kontratua. Prozedura irekiaren bidez izapidetu den lizitazioak 210.000 euroko oinarrizko aurrekontua du (BEZa kanpo), eta azpiegitura estrategiko horren gaitasuna eta fidagarritasuna indartzea du helburu, gaur egun hartzen dituen zerbitzu ugarien ondorioz. Zerbitzu horien artean daude EITBren eta Estatuko kateen FM irratiaren eta Lurreko Telebista Digitalaren (LTB) difusioa, operadore komertzialen telefonia mugikorreko zerbitzuak eta TETRA telefonia profesionaleko zerbitzuak, besteak beste.
Jarduketak 51 metroko altuerako dorre baten diseinua, fabrikazioa, hornidura, garraioa eta instalazioa hartzen ditu barne, baita zimendatze-, indusketa-, hormigonatze-, muntaketa- eta jasotze-lanak ere. Proiektuak, gainera, hainbat elementu osagarri eta segurtasun-elementu aurreikusten ditu, hala nola balizamendua, tximistaren aurkako babes-sistema, homologatutako bizi-linea eta kableak jaisteko zein antenei eusteko berariazko irtenbideak.
Ezaugarri tekniko nagusien artean, egitura berria orduko 200 kilometroko haize-boladek eragindako kargak jasateko diseinatu da, eta Murugaingo kokalekuaren eskakizunetara egokitzen da, bai baldintza orografikoei dagokienez, bai obrari lotutako sarbide-, segurtasun- eta ingurumen-baldintzei dagokienez.
Esleipen honekin, ITELAZPIk aurrera egiten du bere telekomunikazio-azpiegituren hobekuntzan eta modernizazioan, sarearen segurtasuna, sendotasuna eta gaitasun operatiboa indartuz. Dorre berriari esker, zentroan instalatutako sistema erradiatzaile eta komunikazio-sistementzako euskarri eguneratua izango da, eta horrek zerbitzuaren jarraitutasuna eta kalitatea bermatzen lagunduko du.
Jarduketa ITELAZPIk mota horretako esku-hartzeetarako ezarritako irizpide tekniko, ingurumeneko eta segurtasun-irizpideen arabera egingo da, Euskadiko egungo eta etorkizuneko konektibitate-beharrei erantzuteko prest dauden azpiegitura sendo, seguru eta fidagarriak izateko duen konpromisoarekin bat etorriz.
