- Ikasleek Oiz mendiko zentroaren erabilera ezagutarazteko aukera izan zuten.
- Irakaskuntza-sektoreko zabalkuntze-programari lotuta egin da bisita, gizarte-erantzukizuneko ildo nagusietako bat baita.
Urrian zehar, Iurreta, Andra Mari (Galdakao) eta San Jorge (Santurtzi) lanbide heziketako eskoletako ikasleek, guztiak ere Ikaslan sare publikoaren barruan, Itelazpik Oiz mendian kudeatzen duen telekomunikazio zentroa bisitatu zuten. Ikasleek, erdi-mailakoek eta goi-mailakoek, zehatz-mehatz ezagutu ahal izan zuten telekomunikazio-sare publikoaren instalazio nagusietako baten funtzionamendua. Telekomunikazio zentro hau 80ko hamarkadaren hasieran sortu zen, Eitb Media erakunde publikoaren sorreraren ondorioz, eta 2003. urteaz geroztik Itelazpik kudeatzen du. Bisitan, instalazioa osatzen duten sistemak azaldu ziren, oinarrizko zerbitzuak (azpiegitura, energia eta garraioa), eta, ondoren, emandako zerbitzuak zehaztu ziren: FM irratia eta LTD telebista, komunikazio kritikoak eta hirugarren erakundeen kokapena. Hori guztia ikuspegi praktiko batetik bideratuta eta ikasleek etorkizuneko teknikari gisa egin beharko duten benetako jarduerarekin lotuta.
Itelazpik hainbat jarduera garatzen ditu ezagutza hedapenenean. Hain zuzen ere, irakaskuntzaren sektorean ezagutza zabaltzea da gizarte-arloko ekintza-ardatz nagusietako bat, eta hamarkada bat baino gehiago darama bere instalazioetara bisita gidatuen programaren bidez garatzen. Programa hori LHko eskola publikoen sarearekin (Ikaslan Euskadi) eta Bilboko Ingeniaritza Eskolarekin (UPV/EHU) sinatutako lankidetza-hitzarmenen bidez egituratzen da.
