Xabier Zubiaur Itelazpiko zuzendari nagusiak eta Alberto Oleaga Bilboko Ingeniaritza Eskolako Enpresekiko Harremanetarako zuzendariordeak ikasle saridunari eman zioten saria.
Sozietate publikoak Graduko Amaierako Lan bat saritu du, etorkizuneko 5G eta 6G sareetako komunikazioen segurtasuna indartzeko gakoen banaketa kuantikoko teknologien aplikazioan oinarritua.
Ekainaren 17an, Euskal Herriko Unibertsitateko (UPV/EHU) Bilboko Ingeniaritza Eskolak Enpresa Sarien edizio berri bat hartu zuen. Ekimen horrek unibertsitatearen, enpresaren eta gizartearen arteko lotura indartzen du, eta garapen teknologikorako estrategikoak diren arloetan gazte talentua aitortzen du.
Itelazpik, Xabier Zubiaur zuzendari nagusiaren ordezkaritzarekin, beste urte batez parte hartu zuen sari-banaketan, telekomunikazio-ingeniaritzaren arloko Graduko Amaierako Lan edo Master Amaierako Lan onena aitortzen duen TelekoSaria emanez.
Aurtengo edizioan, saria Gaizka González Azkarragarentzat izan zen. Haren lanean, kriptografia kuantikoa 5G eta 6G inguruneetan integratzeko aukera aztertzen da, gakoen banaketa kuantikoko teknologien bidez. Proposamenak hurrengo hamarkadako erronka nagusietako bati heltzen dio: komunikazioen segurtasuna indartzea, konputazio kuantikoaren aurrerapenaren aurrean.
Zubiaurrek ekitaldian adierazi zuenez, “saritutako lana bere zorroztasun teknikoagatik eta etorkizuneko ikuspegiagatik nabarmentzen da; izan ere, belaunaldi berriko sareetan aplikatzeko moduko irtenbideak planteatzen ditu, komunikazioen babesa, azpiegitura kritikoen erresilientzia eta teknologia berrien txertaketa gero eta garrantzitsuagoak diren testuinguru batean”.
Enpresa Sarietan parte hartuz, Itelazpik berriro berretsi du unibertsitatearen eta enpresa-sarearen arteko lankidetzarekiko duen konpromisoa, berrikuntza bultzatzeko tresna gisa, baita telekomunikazioen sektoreko gazte talentua sustatzeko konpromisoa ere.
Euskadiko telekomunikazio-azpiegitura eta -zerbitzuen arduradun den sozietate publiko gisa, Itelazpik funtsezkotzat jotzen du sare publiko seguruago, fidagarriago eta erresilienteagoak garatzen jarraitzea, datozen urteetako erronka teknologiko eta sozialei erantzuteko gai izango direnak.
