Vitoria-Gazteiz, 2026ko otsailaren 13an. – Eusko Jaurlaritzako Industria, Trantsizio Energetiko eta Jasangarritasun sailari atxikitako URA-Uraren Euskal Agentziak eta Gobernantza, Administrazio Digital eta Autogobernu Sailari atxikitako Itelazpi sozietate publikoak lankidetza-hitzarmen bat sinatu dute Ur-Ibilbide berriak diseinatzen eta sortzen jarraitzeko. Ekimen horren helburua da Euskadiko ibai-ekosistemen balioa ezagutaraztea, urarekiko ingurumen-sentsibilizazioa sustatzea eta lurraldeko ur-aberastasuna herritarrei hurbilaraztea.
Xabier Zubiaur Agirrek, Itelazpiko zuzendari nagusiak, eta Asier López Etxebarriak, URAko zuzendari nagusiak, sinatutako hitzarmenak 2018an hasitako lankidetzari jarraipena ematen dio, eta, ordutik, Euskadiko ur-inguruneko hainbat puntutan ibilbideak egiteko aukera eman du.
Xabier Zubiaur Agirrek adierazi duenez, “hitzarmenak bi erakundeek baliabideen erabilera arduratsuarekin, ingurune naturalaren babesarekin eta jasangarritasun-balioen hedapenarekin duten konpromisoa indartzen du”.
Bestalde, Asier López Etxebarriak adierazi duenez, “lankidetza hau adibide bat da ikusteko erakunde publikoen arteko ekintza bateratuak zuzeneko ingurumen- eta gizarte-onurak sor ditzakeela, Euskadiko ibai-ekosistemak ezagutzen eta kontserbatzen lagunduz”.
Ur-Ibilbideak: ibaiak ezagutzeko, baloratzeko eta zaintzeko tresna
Uraren Bidezidorrak dibulgaziozko ibilbideak dira, eta Euskadiko ibai-eremu berezienetako batzuk balioesten dituzte: ibai-buruak, ur-jauziak, hezeguneak eta interes ekologiko bereziko tarteak. Gaur egun, 59 ibilbide daude eskuragarri URAren webgunean, eta euskal ondare hidrikoa modu erraz, seguru eta errespetuzkoan ezagutzeko interesa duen edonorentzat daude eskuragarri.
Ur-Ibilbideen gida: https://www.uragentzia.euskadi.eus/bidexkak-aurkezpena/webura00-030401senderos/eu/
Ibilbide bakoitzak ingurumenari buruzko informazioa, balio natural nabarmenak eta erabilera arduratsurako gomendioak biltzen ditu: ingurumen-sentsibilizazioa sustatu, jabari publiko hidraulikoa herritarrei hurbildu, jabari publiko hidraulikoa ezagutu eta babestu eta ingurune naturalarekiko lotura sustatzen laguntzeko, zein ohitura osasungarriak eta jasangarriak sustatzeko.
Urte hauetan Itelazpirekin izandako lankidetzari esker, besteak beste, Inglares ibaiaren bidezidorrak, Oiartzungo ur-jauzia, Izki ibaia bere parke naturalean eta Tertanga ibaiaren goi-ibarreko ur-jauziak diseinatu dira.
Lau urterako hitzarmena, ekarpen ekonomiko partekatuarekin.
Akordio berriak lankidetza-esparru bat ezartzen du datozen lau urteetarako (2026 – 2029).
URAk konpromisoa hartzen du urtero Itelazpiri ibilbide egokienak proposatzeko (Itelazpieren azpiegituren kokapenetik abiatuta); ibilbide bakoitzaren diseinu teknikoan eta sentsibilizazioan laguntzeko; ibilbide berriak Ur-Ibilbideen Gidan sartzeko eta Itelazpiren lankidetza ikusarazteko.
Itelazpik bere instalazioen mapa eguneratua bidaliko dio URAri urtero, ibilbide berriak diseinatuko ditu Agentziak baliozkotutako metodologiari jarraituz, eta Ur-Ibilbideak ezagutaraziko ditu bere webgunearen eta sare sozialen bidez.
