LTB sistema laburbiltzen duen azalpen-panel berria
Itelazpik 2025-2026 denboraldia amaitu du bisita gidatuen programaren barruan Oizko instalazioan egindako prestakuntza-jardunaldi berri batekin. Jardunaldi horretan Tartanga LHIIko ikasleek parte hartu dute. Ekimenaren bidez, Lanbide Heziketako eta unibertsitateko ikasleei telekomunikazioetako azpiegitura estrategikoak gerturatzen zaizkie, eta ezagutza teknikoaren dibulgazioa ikuspegi praktiko batetik indartzen da.
Edizio honetako azken bisita joan den ostiralean egin zen, Itelazpik Oiz mendiko gailurrean duen instalazioan, Erandioko Tartanga LHIIko ikasleen parte-hartzearekin. Jarduera hau prestakuntza akademikoa osatzeko programa baten parte da, eta ikasleei ezohiko ingurune teknologikoak ezagutzeko aukera ematen die, ohikoan ikasleen eskura ez daudenak, haien ezaugarriengatik.
Jardunaldian zehar, ikasleek bertatik bertara ezagutu zituzten potentzia handiko instalazio baten sistema elektrikoa, Euskadiko telekomunikazioetako 200 zentro baino gehiago lotzen dituen irrati-loturen sarea eta EITB taldearen FM irratiaren eta Lurreko Telebista Digitalaren (LTB) transmisio-sistemak, besteak beste, zerbitzua emateko funtsezkoak diren ekipamenduen artean.
Bederatzi bisita, 100 ikasle baino gehiago eta dibulgazio-panel berri bat edizioari amaiera emateko.
2025-2026 bisita gidatuen programak bederatzi bisitako eta ehun ikasle baino gehiagoren parte-hartzearekin amaitu du balantzea. Edizio honi amaiera emateko, Itelazpik tamaina handiko dibulgazio-panel bat inauguratu zuen, LTB sistemaren osagai nagusiak modu bisualean laburbiltzen dituena, eta etorkizuneko bisitetan azalpen-baliabide gisa erabiliko dena.
Erantzukizun Sozial Korporatiboa
Bisita gidatuen programa Itelazpiren Erantzukizun Sozial Korporatiboaren Planaren dibulgazioaren arloko jarduera-ildo nagusietako bat da. Ekimen hau Ikaslanekin, Euskadiko Lanbide Heziketako zentroen elkartearekin, eta UPV/EHUko Bilboko Ingeniaritza Eskolarekin lankidetzan garatzen da.
